Mundartlyrik
von Matthias Zech

„Die Pfalz – Himmel oder Hölle?"

Gaadeschaufeier

In Landach fallt me Pälzer uff de Balz

e frisch verliebtie Pälzern um de Hals.

Ich hab dich gern, bischbert se, un, mei liewes Berschel, gell,

wann'd fremd gescht, werd dein Blimmelhimmel schnell e gliehend hääßie Hell!

Himmlisch Gebabbel

Wann d'Pälzer babbeln, isch's e hellisch Gebell

fer fremme Ohre, so deiflisch, so grell:

Do knäwwert's, do schläwwert's, do krakelt's un do knallt's, -

awwer fer uns klingt's hochhimmlisch, fer uns aus de Palz.

 

Noh beisamme

Himmel un Hell lichen noh beisamme

im Wingert bei Klinge - gedenkt hett mer's nie -,

viel Hitz zwische denne, un Feier un Flamme:

De Himmels Schorsch pussiert mit de Helle Marie.

 

Bei uns in de Palz

E Stickel Himmel hot se gfunne ghatt

noch dere Bombehell vun Homs,

bei uns in de Palz, des Feier vun Herxe

hot se widder runner gholt, uff de Bodde.

 


Awerglauwe

Wer schänner is, is ach en bessere Mensch.

Beese Mensche singen kä Lieder.

Drei Audos in de Garasch sin besser als norre ääns.

Harte Schtroofe schrecken ab.

Wer nix Uurechtes duut, werd ach net krank.

Jeder wääß, des is alles net wohr.

Die määnschte glaawen trotzdem draa.

 



Mitgfiehl

Ihr liewe Leit,

 

s'geb Leit, die dun mit ihrm Audo redde

un gewwenem en Name,

so wie Fritz odder Bawwett odder Karl-Guschdav.

 

Un s'gebt Leit, die dun mit ihrm Kiehlschrank babble,

jeden Oowend, wann se allää häämkummen,

un werren debei die dickschde Freunde.

 

Froocht mich doch neilich mein Äldschder in de Kich :

Babbe, warum duschdn die Glässer und die Deckel

vun denne Schmierselglässer schbiele

und dann direkt aus de Schbielmaschin

fortschmeiße?

 

Saach ich zu 'm: Määnscht du vielleicht,

do in de Eck, der Milläämer,

der hot iwwerhaupt gar kä Gfiehle?

 

nach oben


Leewensfarwe

 

vorgetragen im Weingut Hitziger

 

 

 

Bunt isses Leewe, gääl un bloo

un schwarz un dunkelrot,

ach silwrichgschbernkelt, strooßegroo,

un goldichbraun wie Brot.

 

Voll is die Welt, voll Krankheit, Krieg,

Erdbeewe, Hunger, Dood;

die ääne feiern Geld un Sieg,

die annre leiden Not.

 

Do saufen Welle, do plärrt's: Blut!,

do greint e Waisekind,

do sterbt em stärkschte Mann sein Mut,

un d'schlauscht werd lahm un blind.

 

Doch do, in dere klenne Stadt,

do dun se was degeche,

anstatt verzweifelt mied und matt,

die Händ in d'Schooß zu leche.

 

Seit Johre gibt's e großes Fescht,

uns 's helfen mit viel Leit,

do kummen bei viel bunte Gäscht

un 's herrscht viel Frehligkeit.

 

Voll is die Welt, voll Herz un Händ

un Hoffnung, Lieb un Mut,

un manchie Kerz im Dunkle brennt,

sacht: Kumm, 's werd widder gut.

 

Bunt isses Leewe, kunterbunt,

un frehlich, gääl un rot,

e Fescht fer Gorchel, Herz und Mund,

e Fescht geche de Dood.

 

 


 

nach oben